గత ప్రభుత్వం అమలు చేసిన అమ్మఒడికి భిన్నంగా, కూటమి ప్రభుత్వం ఇంట్లో ఎంతమంది పిల్లలు ఉంటే అంతమందికీ ఏటా రూ.15,000 చొప్పున ‘Thalliki Vandanam’ కింద అందిస్తోంది. ఇప్పటికే ఈ ఏడాది నిధులు జమ చేసినా, వచ్చే ఏడాది కూడా ఈ ప్రయోజనం పొందాలంటే ప్రభుత్వం కొత్తగా చేపట్టిన సర్వేలో అర్హత సాధించడం తప్పనిసరి.
యూనిఫైడ్ ఫ్యామిలీ సర్వే ప్రారంభం రాష్ట్రవ్యాప్తంగా నేటి నుంచి ‘యూనిఫైడ్ ఫ్యామిలీ సర్వే’ మొదలైంది. ఇది జనవరి 12 వరకు, అంటే దాదాపు నెల రోజుల పాటు కొనసాగనుంది. గ్రామ, వార్డు సచివాలయ ఉద్యోగులు ప్రతి ఇంటికి వెళ్లి కుటుంబ సభ్యుల సమగ్ర వివరాలను సేకరిస్తారు. దీనికోసం ప్రభుత్వం ప్రత్యేకంగా రూపొందించిన మొబైల్ యాప్ను ఉపయోగిస్తున్నారు. ప్రభుత్వం వద్ద ప్రజల పూర్తి డేటా ఉండేలా ఈ సర్వేను అత్యంత ప్రతిష్టాత్మకంగా నిర్వహిస్తున్నారు.
సేకరించే వివరాలు ఇవే.. సచివాలయ సిబ్బంది ఇంటికి వచ్చినప్పుడు ప్రజలు తమ పూర్తి వివరాలు అందించాల్సి ఉంటుంది. కుటుంబ సభ్యుల పేర్లు, ఆధార్, పాన్ కార్డు, మొబైల్ నంబర్లు, విద్య, ఉద్యోగం, ఆదాయ వివరాలతో పాటు ఆస్తుల చిట్టా కూడా నమోదు చేస్తారు. ఇందులో ఇల్లు, పొలాలు, స్థలాలు, వాహనాలు వంటి వివరాలు యాప్లో నిక్షిప్తం చేస్తారు.
ఈ-కేవైసీ తప్పనిసరి సర్వేలో అత్యంత కీలకమైన ఘట్టం ఈ-కేవైసీ (e-KYC). వివరాల సేకరణ తర్వాత ప్రతి వ్యక్తి నుంచి వేలిముద్రలు తీసుకుంటారు. ఎవరైతే ఈ-కేవైసీ పూర్తి చేస్తారో వారిని మాత్రమే ప్రభుత్వం లెక్కలోకి తీసుకుంటుంది. ఒకవేళ ఈ-కేవైసీ పూర్తి కాకపోతే, ఆ వ్యక్తి అందుబాటులో లేనట్లుగా పరిగణించి పథకాలను నిలిపివేస్తారు. కాబట్టి తల్లికి వందనం పథకం కొనసాగాలంటే లబ్దిదారులు తప్పక వేలిముద్ర వేసి సర్వే పూర్తి చేయించుకోవాలి.
అనర్హుల ఏరివేత గత ప్రభుత్వ హయాంలో అనర్హులు కూడా పథకాలు పొందారని, దీనివల్ల ఖజానాకు గండి పడిందని కూటమి ప్రభుత్వం భావిస్తోంది. ఈ సర్వే డేటా ఆధారంగా ఎవరు నిజమైన పేదలు, ఎవరు సంపన్నులు (కార్లు, ఐటీ చెల్లింపుల ఆధారంగా) అనేది నిర్ధారిస్తారు. ఉదాహరణకు, ప్రస్తుతం తల్లికి వందనం కింద రూ.45,000 పొందిన కుటుంబం.. ఈ సర్వేలో అనర్హులుగా తేలితే 2026-27 విద్యా సంవత్సరంలో వారికి పథకం వర్తించదు. రేషన్, పెన్షన్, ఉచిత గ్యాస్ వంటి ఇతర పథకాలు కూడా రద్దవుతాయి.
త్వరలో ఫ్యామిలీ బెనిఫిట్ కార్డ్ ఈ సర్వే అనంతరం డేటా మొత్తం డిజిటలైజ్ అవుతుంది. దీని ఆధారంగా పేదలకు ‘ఏపీ ఫ్యామిలీ బెనిఫిట్ కార్డ్’ (స్మార్ట్ కార్డ్) జారీ చేయాలని ప్రభుత్వం యోచిస్తోంది. ఫిబ్రవరి నుంచి అందుబాటులోకి రానున్న ఈ ఒక్క కార్డు ఉంటే చాలు.. రేషన్, ఆరోగ్య బీమా, పెన్షన్ వంటి సేవలు పొందవచ్చు. ఇతర కార్డులతో పనిలేకుండా అక్రమాలకు తావులేకుండా ఈ విధానం తెస్తున్నారు.
అర్హులైన పేదలకు న్యాయం చేసేందుకే ఈ సర్వే అని, ప్రజలంతా సచివాలయ సిబ్బందికి సహకరించి వివరాలు నమోదు చేసుకోవాలని ప్రభుత్వం కోరుతోంది.